Навіны

Канцэрт разам з Рокаш

16 ліпеня Тацьцяна Беланогая прыме ўдзел у канцэрце гурта Рокаш. Будзе падрыхтаваная спэцыяльная каляфолкавая праграма!

Клюб «Графіці» (зав. Калініна 16), пачатак а 19.00, уваход 10.000.
Замовіць квіткі можна па тэлефонах: +375 29 7547074; +375 29 5636532.
Месцаў мала, таму вызначаемся і набываем квіткі (:

Open-air «Краса Купальля»

7 ліпеня (панядзелак) а 18 гадзіне на імправізаванай прыгожа аздобленай мастацкімі вырабамі пляцоўцы каля будынка цэнтра рамёстваў «Скарбніца» адбудзецца open-air вечарына «Краса Купальля»!

У праграме:

  • паказ народных строяў і etno-fashion калекцыя
  • выстава-продаж (цягам дню) і творцы-ракі, што нарадзіліся купальскаю парою
  • Тацьцяна Беланогая зь песнямі ў стылі bard rock
  • Уладзімір Аляўдзін, book-presentation «Промні на гарызонце» + сюрпрыз!

Уваход вольны! Вул. Кісялёва, 40, тэл: 2893311

M&M пра творчасьць Тацьцяны Беланогай

Альбом маладэчанскай сьпявачкі Тацьцяны Беланогай «Дзьвюхкроп'е», які пасьля ейнай перамогі ў прэстыжным эўрапейскім конкурсе выдала нядаўна варшаўская фірма «DigiPres», працягвае прывабліваць увагу прэсы й на Радзіме. Зьмястоўныя рэцэнзыі апублікавалі сайт «Наша Беларусь» (20.03.2008), «Краязнаўчая ґазэта» №14 (11.04.2008), «Товарищ» №18 (15.05.2008) і г.д. Найбольшую ўвагу надалі альбому кіты нацыянальнай рок-крытыкі, аўтары несьмяротных кніжных бэстсэлераў «Праз рок-прызму» і «222 альбомы беларускага року» Вітаўт Мартыненка й Анатоль Мяльґуй. Вось рэцэнзыя аб песьнях Беланогай…

Дарэчы, у сеціве даступныя таксама абедзьве кнігі названых аўтараў, нават рарытэтнае амэрыканскае выданьне 1989 года:

Аматары парадаксальнай статыстыкі могуць занатаваць таксама, што на дадзены момант існуе тры калекцыйных варыянты выданьня кнігі «222 альбомы беларускага року»: з нарвэзкім кардонам вокладкі ў ґлянцавым ламінаце, больш масавы ґлянцавы ламінат на звычайным кардоне і нядаўна выдадзены матавы ламінат.

Дар'я ГАРОШКА

Вялікае абнаўленьне сайту

Сёньня на сайце адкрыўся новы разьдзе — «Відэа». Як зразумела з назвы, там будуць прадстаўленыя відэа-кліпы Тацьцяны Беланогай. Зараз там відэа на песьні «Да цябе» і «Мой голас чорны». Таксама зьявіўся разьдзел «Кантакты».

Апроч таго, абнавіўся разьдзел «Галерэя», дзе вы зможаце паглядзець малюнкі Тацьцяны, прысьвечаныя вандроўкам і каханьню. Аўтарка тлумачыць:

Даўно абяцала паказаць свае малюначкі на сайце. Іх называлі «выпендрожам», а я іх называю сваімі дзеткамі. Прычым «гэны» ў малюначкаў мае і тых людзей, якія мяне атачаюць і зь якімі я бачылася калі-небудзь.

Прыемнага прагляду!

Чарговы тур на «Тузіне Гітоў»

У 15-ым туры гіт-параду «Тузін Гітоў» песьня Тацьцяны Беланогай «Белая птушка» заняла толькі восьмае месца, затое экспэрт туру — дырэктар Першага Альтэрнатыўнага Тэлеканалу A-ONE ў Беларусі Алег Скарабагаты — выказаў прыемныя словы ў адрас песьні:

Прыйшлася да спадобы і «Белая птушка» Тацьцяны Беланогай. Хацелася б, каб яна пайшла ў народ, не стае такой музыкі масам. Музыкам – асаблівая падзяка.

Працягваем галасаваць!

Рэцэнзія Анатоля Мяльгуя

Вядомы беларускі музычны крытык Анатоль Мяльгуй напісаў рэцэнзію на альбом Тацьцяны Беланогай «Дзьвюхкроп’е» для газэты «Белорусы и рынок». Зь яе зьместам вы можаце азнаёміцца на сайце газэты альбо ў разьдзеле «Прэса» афіцыйнага сайту сьпявачкі.

Трэцяе месца на «Тузіне Гітоў»

У 13-ым туры гіт-параду «Тузін Гітоў» песьня Тацьцяны Беланогай «Белая птушка» набрала 452 галасы і заняла ганаровае трэцяе месца. Віншуем!

Сёньня распачаўся новы тур. Працягваем галасаваць!

Інтэрвію праграме «Новая зямля»

У сёньняшнім (13 сакавіка 2008 году) этэры праграмы Віктара Сямашкі «Новая зямля» на Радыё Unistar прагучала інтэрвію з Тацьцянай Беланогай, прысьвечанае выданьню альбома «Дзьвюхкроп'е». Вашай увазе запіс гэтага інтэрвію.

Спампаваць у фармаце mp3 (2,3 Mb) ці праслухаць зараз:

Дыск “Дзьвюхкроп'е” у інтэрнэт - краме

Паважанае спадарства! Для тых, хто жыве не ў Беларусі, зараз з'явілася мажлівасьць набыць дыск «Дзьвюхкроп'е» у інтэрнэт-краме merlin.pl, раздзел folk!

Тацьцяна Беланогая: тым, хто адлятае

У 10-м туры на «Тузіне Гітоў» сьпявачка Тацьцяна Беланогая прадстаўляе песьню «Белая птушка» з свайго новага альбома «Двукроп'е». Яна прысьвечаная ўсім беларусам, хто змушана ці з патрэбы пакінуў межы сваёй Радзімы. «Апошнім часам шмат маіх сябрукоў зьехалі зь Беларусі. Гэта наклала вялікі адбітак на маю сьвядомасьць, таму і нарадзілася гэтая песьня».

Гэтую песьню Тацьцяна напісала пасьля таго, як яе сяброўка вымушана была зьехаць у Варшаву, каб набыць адукацыю па праграме Каліноўскага. «Так склалася, што не яна адна, таму хацелася бы прысьвяціць яе ўсім беларусам на чужыне», - кажа аўтарка «Белай птушкі».

Удзел у запісе песьні ўзяў вядомы скрыпач Карэн Карапецян. «Ён імгненна адчуў настрой песьні і мы адразу ж яе запісалі. Гэта было супэр!» - апавядае Тацьцяна.

«Белая птушка» ўвайшла ў новы альбом сьпявачкі «Двукроп'е», прэзэнтацыя якога заплянаваная на люты.

Галасуйце за песьню Тацьцяны на «Тузіне Гітоў»!